भक्तपुर, असार ४ । वरिष्ठ नाट्यकर्मी, लेखक तथा निर्देशक रामशेखर नकर्मी का ख्याल (प्रहसन) हरूमाथि केन्द्रित तीनदिने कार्यशाला भक्तपुरमा सुरु भएको छ।
नाट्यकर्मी समाज नेपाल, भक्तपुरको आयोजनामा सञ्चालन भएको “रामशेखर नकर्मीका ख्यालः हरूको कार्यशाला” असार ४, ५ र ६ गतेसम्म सञ्चालन हुने आयोजकले जनाएको छ। कार्यशालामा रामशेखर नकर्मीद्वारा सिर्जित ख्याल तथा प्रहसनहरूको अध्ययन, विश्लेषण, प्रस्तुति र समसामयिक सान्दर्भिकताबारे छलफल गरिनेछ।
नेपाली रंगमञ्च तथा साहित्य क्षेत्रमा महत्वपूर्ण योगदान पुर्याएका रामशेखर नकर्मी भक्तपुरका चर्चित कलाकार, लेखक तथा निर्देशकका रूपमा परिचित छन्। उनले नाटक, प्रहसन, कथा तथा उपन्यासमार्फत नेपाली समाजका विविध पक्षलाई उजागर गरेका थिए। उनको २०७३ सालमा निधन भएको थियो।
आयोजकका अनुसार कार्यशालाले नयाँ पुस्ताका नाट्यकर्मीलाई रामशेखर नकर्मीका सिर्जना र योगदानबारे जानकारी गराउनुका साथै ख्याल परम्पराको संरक्षण र प्रवर्द्धनमा सहयोग पुर्याउने अपेक्षा गरिएको छ। नाट्यकर्मी समाज नेपालले विगतमा पनि भक्तपुरमा विभिन्न नाटक मेला तथा रंगकर्मसम्बन्धी कार्यक्रम सञ्चालन गर्दै आएको छ।
कार्यशालामा स्थानीय नाट्यकर्मी, कलाकार, विद्यार्थी तथा रंगमञ्चप्रति रुचि राख्ने व्यक्तिहरूको सहभागिता रहेको छ।
