काठमाडौँको तीनकुने क्षेत्रमा भएको हिंसात्मक आन्दोलनमा संलग्न भएका १ सय ६ जनालाई प्रहरीले पक्राउ गरेको छ । हिजो दुर्गा प्रसाईंको नेतृत्वमा भएको उक्त प्रदर्शनमा तोडफोड, लुटपाट, आगजनी भएका कारण प्रहरीले यसमा संलग्न व्यक्तिहरूको खोजी गर्दै अनुसन्धान सुरु गरेको हो । जिल्ला प्रहरी परिसर काठमाडौँ, मातहतका वृत्तहरू, काठमाडौँ उपत्यका अपराध अनुसन्धान कार्यालय र अन्य प्रहरी कार्यालयका टोलीले पक्राउ गरिएका व्यक्तिहरूको वर्गीकरण गर्ने काम गरिरहेको जनाइएको छ । एसपी अपिलराज बोहोराका अनुसार, अनुसन्धानका क्रममा हालसम्म १ सय ६ जनालाई पक्राउ गरिएको छ । रवीन्द्र मिश्र, धवल शमशेर राणा, स्वागत नेपाल लगायतका केही प्रमुख व्यक्तिहरूलाई काठमाडौँ उपत्यका अपराध अनुसन्धान कार्यालयको टोलीले पक्राउ गरेको छ । आज ललितपुरबाट धर्मगुरू पुष्कर खतिवडालाई पनि पक्राउ गरिएको छ । प्रहरीका अनुसार, सामाजिक सञ्जालमा आएका फोटो र भिडिओहरूको आधारमा पनि संलग्न व्यक्तिहरूको खोजी भइरहेको छ । केही व्यक्तिहरू भने घरबाट भागिसकेका छन् र उनीहरूको बारेमा पनि अनुसन्धान भइरहेको प्रहरीको भनाइ छ । प्रहरीले दुर्गा प्रसाईंको पनि खोजी गरिरहेको जानकारी दिएको छ ।
