डोलेश्वर महादेवमा श्रावणी मेलाको समापन
भक्तपुर, भाद्र ६ गते
सिपारे माहाद्यः अर्थात केदारनाथको शीर डोलेश्वर महादेवमा श्रावणी मेलाको आज समापन गरेको छ । ३८ दिनसम्म भएको श्रावणी मेलाबाट ८५ लाख भन्दा बढी आर्थिक सहयोग संकलन गरेको जानकारी दिदै आज सिपारे महाद्यःलाई केदारनाथको शिर डोलेश्वर घोषणा गरेको दिनको सम्झनामा सूर्यविनायक नगरपालिकामा सार्वजनिक विदा पनि दिएको छ । केदारनाथको शीर घोषणा गरेको उपलक्ष्यमा आज मन्दिरका ४ वटै ढोका खुल्ला राखिएकाले भक्तजनहरुको आज विहान देखि नै घुइचोलागेको उल्लेख गर्दै केदारनाथको शिरु डोलेश्वर महादेव संरक्षण तथा विकास समितिका अध्यक्ष धर्मराज बस्नेतले डोलेश्वर स्थानीय समुदायको मात्र नभई राष्ट्रकै सम्पदा भएको भन्दै यस मन्दिरबाट देशले महत्वपूर्ण आम्दानीको श्रोत बनाउन सकिने धारणा व्यक्त गरेका थिए ।
सूर्यविनायक नगरपालिकाका प्रमुख बासुदेव थापाले उद्घाटन गरेको सो समारोहमा बोल्दै भक्तपुरका प्रमुख जिल्ला अधिकारी रोशनीकुमारी श्रेष्ठले सम्पदा संरक्षण गर्ने सबैको दायित्व भएको भन्दै मन्दिरमा भेटि चढाउने नाममा विभेड गर्न नहुने बताउनु भयो । धेरै पैसा चढाउँदैमा तिनीहरुको मात्र नाम लिएर आम मानिसको धार्मिकका आस्था नै गिराउने काम गर्न नहुने चर्चा गर्दै उहाँले मन्दिरको आयश्रोतलाई अभिलेख राखेर व्यवस्थित गर्नुपर्नेमा जोड दिनु भयो ।
उपप्रमुख सरीता भट्टराई, जनप्रतिनिधी पुष्पराज बस्नेत सहितका अतिथिहरुले मन्दिरको ऐतिहासिक, धार्मिक महत्वलाई झल्काउँदै श्रावणी मेला सफल पार्न सहयोग गर्ने सबैलाई धन्यवादज्ञापन गरेका थिए ।
