भक्तपुरमा अन्तर नगर महिला कबड्डी प्रतियोगिता आजबाट सुरु
२०८० फागुन २९ गते, मंगलबार
नेपाल मजदुर किसान पार्टीका अध्यक्ष नारायणमान बिजुक्छें (रोहित)ले २०८० फागुन २९ देखि चैत्र ३ गते सम्म सञ्चालन हुने अन्तर नगर महिला कबड्डी प्रतियोगिताको आज एक समारोहबीच पानसमा दीप प्रज्ज्वलन गरी समुद्घाटन गर्नुभयो ।
भक्तपुरको सहिद स्मृति खेलमैदानमा भएको उद्घाटन समारोहमा प्रमुख अतिथि बिजुक्छेंले खेलकुद महिलाहरुलाई शारीरिक र मानसिक रुपले बलियो बनाउने सशक्त माध्यम भएको बताउनुभयो ।
खेलकुदमा सहभागी महिलाहरु अरुभन्दा तुलनात्मक रुपमा सभ्य, अनुशासित र निडर हुने बताउँदै उहाँले खेलकुद स्वास्थ्य र तन्दुरुस्तको निम्ति पनि भएको बताउनुभयो ।
खेलकुदको नियमअनुसार खेलाडीहरुले उत्साहपूर्वक प्रतियोगितामा सहभागी हुन आह्वान गर्दै अध्यक्ष बिजुक्छेँले खेलमा हार जित स्वाभाविक भएको रखेलाडीहरुबीच आपसी मित्रता कायम गर्ने अवसर पनि भएको बताउनुभयो ।
कार्यक्रमका सभापति एवम् भक्तपुर नपाका प्रमुख सुनिल प्रजापतिले विभिन्न नगरपालिकाबाट सहभागी खेलाडीहरुलाई भक्तपुर नपामा स्वागत गर्दै खेलकुदको माध्यमबाट देशका विभिन्न नपासँग सुमधुर सम्बन्ध विस्तार गर्ने उद्देश्यले प्रतियोगिताको आयोजना भएको बताउनुभयो ।
जनप्रतिनिधि र खेलाडीहरुसँग अनुभव आदानप्रदान गर्ने राम्रो अवसर हुने बताउँदै उहाँले खेलाडीको प्रतिभा प्रदर्शन गर्ने अवसरको रुपमा प्रतियोगितालाई उपयोग गर्न खेलाडीहरुलाई मार्गनिर्देश गर्नुभयो ।
भक्तपुर नपाले खेलकुदलाई पनि प्राथमिकतामा राख्दै हरेक नागरिकलाई खेलकुद र शराीरिक अभ्यासमा सहभागी गराउने प्रयास चालु राखेको बताउँदै भक्तपुर नपाले नियमित खेलकुद प्रशिक्षणको पनि आयोजना गर्दै आएको बताउनुभयो ।
त्यस्तै बागमती प्रदेशका सांसद सुरेन्द्रराज गोसाईले अन्तर नगर खेलकुद प्रतियोगिता आयोजनाले देशका विभिन्न नगरपालिकाका खेलाडी र नगरबासीहरुबीच मैत्रीपूर्ण सम्बन्ध, आपसी सद्भाव विकास हुने बताउँदै देशलाई स्वस्थ बनाउन त्यहाँका नागरिकहरु मानसिक र शारीरिक रुपमा स्वस्थ हुनुपर्ने धारणा राख्नुभयो ।
खेलकुदलाई राज्यले उच्च प्राथमिकतामा राख्नुपर्छ भन्दै उहाँले देश हाँक्नेहरुसँग अनुशासन नहुँदा नेपाली जनताले अप्ठेरो अवस्था महसुस गरिरहेको बताउनुभयो । शासकहरुले खेलाडीहरुको देशप्रेम र अनुशासनबाट पनि केही पाठ सिक्नुपर्ने बताउँदै उहाँले नयाँ पुस्ताले आ–आफ्नो तर्फबाट अनुशासनको प्रदर्शन गर्नुपर्छ भन्नुभयो ।
नेपाल कबड्डी संघका अध्यक्ष तुलसा थापाले महिला कबड्डी आयोजनाले भक्तपुर नपाप्रति आभार प्रकट गर्दै गाउँगाउँमा पूर्वजहरुले खेल्ने कबड्डी खेल अन्तर्राष्ट्रिय क्षेत्रमा पनि तीव्र गतिले विकास हुँदै आएको बताउनुभयो ।
खेलकुद विकासमा तीनवटै तहका सरकारहरु समन्वय आवश्यक भएको बताउँदै उहाँले नेपालका खेलाडीहरुलाई विदेश पलायन हुनबाट रोक्न नेपालमै रोजगारीको सुनिश्चितता गर्नुपर्ने धारणा राख्नुभयो ।
भनपा वडा नं. १ का वडाध्यक्ष तथा युवा तथा खेलकुद समितिका संयोजक श्यामकृष्ण खत्रीले अन्तर नगर महिला कबड्डी प्रतियोगितामा १५ वटा नगरपालिका सहभागी रहेको बताउनुभयो । उहाँले प्रतियोगितामा प्रथम हुने टीमलाई रु. १ लाख ५० हजार, दोस्रो हुनेलाई रु. १ लाख, तेस्रो र चौथो हुनेलाई रु. ५०–५० हजार प्रति समूह नगद पुरस्कारको व्यवस्था गरेको जानकारी गराउनुभयो ।
कार्यक्रममा भक्तपुर नपाका प्रमुख प्रशासकीय अधिकृत वसन्त भट्राईले खेलकुदको प्रवद्र्धन र सम्बद्र्ध गर्न भक्तपुर नपाले प्रत्येक वर्ष अन्तर नगर खेलकुद प्रतियोगिता आयोजना गर्दै आएको बताउँदै खेलकुदले देशको भूगोल, पहिचान, संस्कृतिक, रहन र जीवनशैलीलाई पनि जोड्ने काम गर्ने बताउनुभयो ।
कार्यक्रममा भनपा वडा नं. ४ का वडाध्यक्ष उपेन्द्र सुवालले धन्यवादज्ञापन मन्तव्य राख्नुभएको थियो भने युवा तथा खेलकुद समितिका सदस्य रामसुन्दर बासीले पनि बोल्नुभएको थियो ।
कार्यक्रममा निर्णायकको तर्फबाट राष्ट्रिय निर्णायक दिलिपनारायण श्रेष्ठ र खेलाडीहरूको तर्फबाट भक्तपुर नगरपालिकाका राष्ट्रिय महिला कबड्डी खेलाडी पूजा दुवालले अन्तर नगर महिला कबड्डी प्रतियोगिता २०८० को खेल अखिल नेपाल कबड्डी संघको नियमअनुसार अनुशासित र मर्यादित ढंगले सम्पन्न गर्न शपथ लिनुभयो ।
प्रतियोगिताको उद्घाटनअघि भक्तपुर नपा वडा नं. ९ दत्तात्रयबाट ¥यालीसहित नगरपरिक्रमा गरी सहिदस्मृति खेलमैदानमा पुगी सभामा परिणत भएको थियो । ¥यालीमा भक्तपुर नगरपालिकाका जनप्रतिनिधिहरू, पूर्व जनप्रतिनिधिहरू, कर्मचारीहरू, स्वयम्सेवक, खेलाडी तथा विभिन्न विद्यालयहरूका विद्यार्थीहरूको उल्लेख्य सहभागिता रहेको थियो ।
अन्तर नगर महिला कबड्डी प्रतियोगिताअन्तर्गत पहिलो खेल भक्तपुर नगरपालिका र मध्यपुर थिमी नगरपालिकाबीच भएको थियो ।
