काठमाडौं उपत्यकामा माघ १५ गतेसम्म विद्यालय बन्द गर्ने, परीक्षा भने नरोकिने निर्णय ।
काठमाडौं उपत्यकाका विद्यालय माघ १५ गतेसम्म बन्द हुने भएका छन् । काठमाण्डौं, ललितपुर र भक्तपुरको प्रमुख जिल्ला अधिकारीको आज बसेको संयुक्त बैठकले आजैदेखि लागु हुने गरि माघ १५ गतेसम्म भौतिक उपस्थितीमा पठनपाठन संचालन नगर्न निर्देशन दिएको हो । बैठकपछि जारी विज्ञप्तीमा कोरोना रोकथाम तथा नियन्त्रणको लागि तीनै जिल्लाले माघ १५ गतेसम्म विद्यालय बन्द गर्ने निर्णय गरेको उल्लेख छ । पूर्व निर्धारित सेमेष्टर र वार्षिक परीक्षा भने स्वास्थ्य मापदण्ड पालना गरेर लिन सकिने छ ।
यस्तै बैठकले १२ देखि १७ वर्ष उमेर समूहका बालबालिकालाई एक हप्ताभित्र अध्ययनरत विद्यालयमा नै कोरोनाविरुद्धको खोप अनिवार्य रुपमा लगाइसक्न पनि निर्देशन दिएको छ । छलफल पछि तीनै जिल्लाले सूचना निकालेर माघ ७ गतेदेखि कुनै पनि सार्वजनिक स्थल वा सार्वजनिक निकायमा सेवा प्राप्त गर्न कोरोनाविरुद्धको खोप अनिवार्य लगाएको हुनुपर्ने र त्यसको खोप कार्ड हुनुपर्ने जनाएका छन् । यस्तै २५ जनाभन्दा बढी मानिसको उपस्थिती हुने गरी कुनै पनि किसिमको भेला तथा महोत्सव एवं सामाजिक कार्य नगर्न पनि निर्देशन दिएको छ । घरबाहिर निस्कँदा कोरोनाबाट बच्न अनिवार्य मास्क लगाउने, साबुनपानीले हात धुने, व्यक्तिगत दुरी कायम गर्ने लगायत स्वास्थ्य मापदण्ड अपनाउन निर्देशन दिएको छ ।
