जुम्लाको हिमा गाउँपालिका वडा नम्वर ६ खलढुङ्गा बस्ती पहिरोको उच्च जोखिममा ।
मान बहादुर कुँवर, रेडियो खुला आकाश, जुम्ला
जुम्लाको हिमा गाउँपालिका वडा नम्वर ६ खलढुङ्गा बस्ती पहिरोको उच्च जोखिममा छ । गाउँमाथी कयौं ढुङ्गाले जमिन जमिन छोडेपछि अधिकांश स्थानीयहरु ज्यान जोगाउन लेकमा सरेका छन् । बस्ती स्थानान्तर नहुँदा कतिपय जोखिम मोलेरै बसिरहेका छन् । जुम्लाको हिमा गाउँपालिका ६ को खलढुङ्गा बस्तीमा असार ४ गतेको पहिरोले १० वटा घर भत्किए । बस्ने घर नहुँदा अहिले लेकमा बास बस्नुपरेको छ । अरु गाउँका मानिस पानी प¥यो भने घरभित्र पस्छन् तर खलढुङ्गाका स्थानीय आकाशमा कालो बादल लाग्ना साथ घर छोडेर भाग्नुपर्छ । स्थानीय ८० वर्षका रुपकला अधिकारीलाई पनि यहि बाध्यता छ । पाँच वर्ष अघि यो बस्तीमा भिरालो पाखोबाट ठुला ठुला ढुङ्गा खसेका थिए । घर भत्कियो तर मानवीय क्षति भने भएन । त्यतिबेला खस्न लागेका ढुङ्गाहरु स्थानीयले पर्खाल लगाएर रोकेका थिए । अहिले पर्खालनै च्पापेर ढुँगाहरुले जमिन छोडिसकेका छन् । भिरालो पाखोबाट सैयौं ढुङगा गाउँमा खस्ने जोखिम छ, हरेक क्षण आफुहरु मृत्युसँग लडिरहँदा सरकार बेखबर बनेको स्थानीय तीर्थ अधिकारी बताउनुहुन्छ । असार पहिलो साताको पहिरोले विस्थापित भएकाहरुले छिमेकीको साहारामा बसिरहेका छन् । पहिरोले घर भत्काएपछि तीन साता देखी छिमेकिको घरमा बस्दै आउनुभएका स्थानीय मुनराज अधिकारी सबैले बस्तीको समस्यालाई नजरअन्दाज गरिहेको गुनासो गर्नुहुन्छ । गाउँपालिका का अध्यक्ष रज बहादुर शाहीका अनुसार गाउँ कार्यपालिकाबाटै आर्थिक वर्ष ०७६÷०७७ मा बस्ती स्थानान्तर गर्ने निर्णय गरिएको छ । तर पालिकाको बजेटले बस्ती स्थानान्तर गर्न सम्भव छैन ।
