भक्तपुरका १०६ जना सहित थप दुई हजार ६१९ मा कोरोना भाइरस सङ्क्रमण पुष्टि
भक्तपुर, बैशाख ११ गते
भक्तपुरका १०६ जना सहित देशभर पछिल्लो २४ घण्टामा थप दुई हजार ६१९ जनामा कोभिड–१९ सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार आठ हजार ६६८ जनाको स्वास्थ्य परीक्षण गर्दा सो सङ्ख्यामा सङ्क्रमण पुष्टि भएको हो । जसमा सात हजार ५२५ जनाको पिसिआर र एक हजार १४३ जनाको एन्टिजेन परीक्षण गर्दा क्रमशः दुई हजार ४८६ र १३३ जनामा सङ्क्रमण पुष्टि भएको हो । आजसम्म नेपालमा कोरोना भाइरस सङ्क्रमितको सङ्ख्या दुई लाख ९७ हजार ८६ पुगेको छ । त्यस्तै पछिल्लो समय थप ३६८ जना निको भएका छन् । यससँगै निको हुनेको सङ्ख्या दुई लाख ७७ हजार १२३ रहेको छ । निको हुने दर भने ९३ दशमलब तीन प्रतिशत रहेको छ । अहिले देशभर १६ हजार ८२८ सक्रिय सङ्क्रमित छन् । उनीहरूमध्ये ७१ क्वारेन्टिनमा रहेका छन् । अन्य आइसोलेसनमा रहेका छन् । हालसम्म नेपालमा २३ लाख ९५ हजार ७२५ को पिसिआर परीक्षण भएको छ । त्यस्तै कोरोनाका कारण १४ जनाको मृत्यु पुष्टि भएको छ । हालसम्मा तीन हजार १३६ जनाले कोरोनाको कारण ज्यान गुमाएको मन्त्रालयले जनाएको छ । काठमाडौँमा ६४४ जनामा कोरोना सङ्क्रमण पुष्टि भएको छ । यस्तै बाँकेका ३५२, रुपन्देहीका २६८, दाङका १७२ र ललितपुरका १४१ जनामा सङ्क्रमण देखिएको छ । काठमाडौँ उपत्यकाका तीनवटै जिल्ला काठमाडौँ, भक्तपुर, ललितपुरका साथै पर्सा, कास्की, दाङ, बाँके र रुपन्देहीमा सक्रिय सङ्क्रमितको सङ्ख्या ५०० नाघिसकेको छ ।
भक्तपुर जिल्लास्थित भक्तपुर नगर पालिकाका पुरुष १४ र महिला १० गरी २४ जना चाँगुनारायण नगर पालिकाका ५ पुरुष र ६ महिला गरी ११ जना , सुर्य विनायक नगरपालिकाका २२ पुरुष र १४ महिला गरी ३६ जना र मध्यपुर थिमी नगर पालिकाका १६ पुरुष र १२ महिला गरी २८ जना र सम्पर्क बिहिन ४ पुरुष र ३ महिला गरी ७ जना १०६ जनामा थप कोरोना संक्रमण पुस्टि भएको स्वास्थ्य कार्यालय भक्तपुरका कार्यालय प्रमुख कृष्ण बहादुर मिजारले जानेको छ । कार्यालय प्रमुख मिजरका अनुसार भक्तपुरमा शनिबार कोभिसिलको दोस्रो खोप ६७० जनाले लगाए भने भेरोशीलको पहिलो खोप १४३९ जनाले लगाएका छन् ।
