भक्तपुर क्यान्सर अस्पतालमा फेरी आन्दोलन सुरु
भक्तपुर, मंसिर ६ गते
भक्तपुर क्यान्सर अस्पतालमा फेरी आन्दोलन चर्केको छ । भक्तपुर क्यान्सर अस्पताल सरकारी अस्पतालको रुपमा रुपान्तरण भएपछि सबै खुसि भएका थिए तर विगत २२ वर्ष देखि क्रियाशिल रहेका २७९ कर्मचारीहरु सबैलाई निकाल्ने संकेट गरेपछि अस्पतालका चिकित्सक, नर्स तथा कर्मचारीहरु अहिले आन्दोलनमा उत्रेका हुन् । गत कार्तिक २४ गते बसेको मन्त्रीपरिसद्को बैठकले भक्तपुर क्यान्सर अस्पताललाई सरकारी अस्पतालको रुपमा विकास गर्ने निर्णय गरेसँगै अस्पताल सञ्चालनका लागि बनाएको कार्यविधिमा सबै कर्मचारीलाई करारमा राख्न सकिने भनि उल्लेख गरेको पाए पछि सो अस्पतालमा कार्यरत चिकित्सक, कर्मचारीहरु आन्दोलनमा उत्रेका हुन । आज देखि आन्दोलमा उत्रिएका चिकित्सक कर्मचारीले अस्पतालका इमरजेन्सी सेवा बाहेक सम्पूर्ण सेवा बन्द गरेको अस्पतालका प्रशासक राजाराम तजलेले बताउनु भएको छ । सो अस्पतालमा ५४ जना चिकित्सक, ९८जना नर्स र ६३ कर्मचारी गरी २१५ स्थायी कर्मचारी रहेका थिए भने अन्य ६४ अस्थायी सहित २७९ जना कर्मचारीहरु क्रियाशिल रहेका थिए । अस्पतालमा स्थायी सेवामा रहेका स्वास्थ्यकर्मी र कर्मचारीहरुलाई समेत हटाएर करारमा राखेर अस्पताल सञ्चालन गर्ने सरकारको नीति आएपछि कार्यरत चिकित्सकहरु आन्दोलनमा उत्रिएका हुन । अहिले अस्पताल परिसरमा रहेर चिकित्सक कर्मचारी आन्दोलनमा रहेका छन् । कार्यरत चिकित्सक कर्मचारी आन्दोलनमा उत्रिएपछि मन्त्रालयसँग बार्ता गर्न एक टोली स्वास्थ्य मन्त्रालय पुगेको छ ।
