प्रहरीले होलीमा जबरजस्ती रंग दलेर झगडा गरेको अभियोगमा ६५ जनालाई पक्राउ गरेको छ । महानगरीय प्रहरी परिसर, काठमाडौंले राजधानीका विभिन्न क्षेत्रबाट सात जना युवतीसहित अन्यलाई आज पक्राउ गरेको हो । पक्राउ पर्नेमा बलजफ्ती लोला हान्ने पनि रहेका काठमाडौं प्रहरीका डीएसपी होविन्द्र बोगटीले जानकारी दिनुभयो । उहाँका अनुसार समूहमा झगडा गर्दागर्दै पनि केही पक्राउ परेका छन् । पक्राउ गरेको स्थानबाट नजिकै रहेको प्रहरी वृत्तमा उनीहरुलाई राखिएको छ । साँझसम्ममा कसुरको गम्भीरता हेरेर उनीहरुलाई छाड्ने वा मुद्दा चलाउने टुंगो लाग्ने बोगटीले बताउनुभयो । यसैविच विश्वव्यापी रुपमा फैलिएको कोरोना भाइरसका कारण यसवर्षको होली पर्व पनि प्रभावित भएको छ । कोरोनाको त्रासका कारण विगतमा जत्ति होलीको उल्लास छैन । ‘कोरोनाका कारण आज चहलपहल कम देखिएको छ । जिल्ला प्रशासन कार्यालय, काठमाडौंले भिड जम्मा भएर होली खेल्न निषेध गर्ने निर्णय गरेको थियो । साथै, प्रशासनले सार्वजनिक रुपमा आयोजना हुने औपचारिक कार्यक्रमका लागि पनि अनिश्चिकालसम्मका लागि स्वीकृति नदिने निर्णय गरेको थियो । यही निर्णयका कारण पनि काठमाडौंमा सर्वसाधारणको चाप न्यून देखिएको प्रहरीले जनाएको छ ।
