फेरी बढ्यो भक्तपुरमा संक्रमित, २,२८७ कोरोना मुक्त
काठमाण्डौ, भाद्र २३ गते
पछिल्लो २४ घण्टाभित्र २ हजार २८७ जना संक्रमितहरु कोरोना मुक्त भएका छन् । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार मंगलबार १० हजार ६११ जनाको पीसीआर परीक्षण गर्दा ९०२ जना पोजेटिभ देखिएको छ । देशभर ९०२ जना कोरोना संक्रमित भएकाहरुमा भक्तपुरका ५८जना परेका छन् । काठमाण्डौ उपत्यकामा ३९६ जना संक्रमित भएका मध्ये काठमाण्डौका ३०० जना, भक्तपुरका ५८ जना र ललितपुरका ३८ जना संक्रमित भएका हुन । अहिले कुल संक्रमितको संख्या ४८ हजार १३८ पुगेको छ । त्यस मध्ये ३२ हजार ९६४ जना कोरोना मुक्त भइसक्दा निको हुने दर ६८.५ प्रतिशत पुगेको छ । संक्रिमतहरु निको हुनेक्रम बढे पनि थप संक्रमित हुनेको संख्यामा भने कमी आउंन सकेको छैन ।
अहिले देशभर १४ हजार ८६८ जना सक्रिय संक्रमितहरु रहेका छन् । प्रवक्ता डा. गौतमका अनुसार आइसोलेसनमा १४ हजार ८६८ जना उपचारमा छन् भने क्वारेन्टिनमा ५ हजार ३१० छन् । मंगलबार थप ६ जनाको मृत्यु हुँदा कोरोना संक्रमित भई मृत्यु भएकाको संख्या ३०६ पुगेको छ । १ महिला सहित मंगलबार मृत्यु भएका ६ जनाहरुमा काठमाण्डौका ८० वर्षीय एक महिला, ८५ वर्षीय एक पुरुष, सुनसरीका ७० वर्षीय पुरुष, पर्साका ५४ र ६० वर्षीय पुरुष र कपिल बस्तुका ६२ वर्षीय पुरुष रहेका हुन । कोरोना संक्रमित १४४ जना आइसीयू र २३ जना भेन्टिलेटरमा छन् ।
मंगलबार संक्रमित ९०२ जना ४६ वटा जिल्लाका हुन भने हाल मोरंग, सुनसरी, धनुसा, सर्लाही, काठमाण्डौ, ललितपुर, चितवन र रुपन्देही जिल्लामा ५ सय भन्दा बढी संक्रमितहरु उपचारमा रहेका छन् भने ताप्लेजुंग, मनांग, मुुस्तांग, डोल्पा, मुगु र हुम्ला गरी ६ वटा जिल्लाहरु भने कोरोना सून्य जिल्ला रहेका छन् ।
