आर्थिक वर्ष २०७९÷८० को आर्थिक सर्वेक्षण सार्वजनिक, आर्थिक वृद्धिदर २.१६ प्रतिशतमा खुम्चिने सरकारको अनुमान।
सरकारले आर्थिक वर्ष २०७९÷८० को आर्थिक सर्वेक्षण सार्वजनिक गरेको छ । आज बसेको प्रतिनिधिसभाको बैठकमा अर्थमन्त्री डा.प्रकाशशरण महतले आर्थिक सर्वेक्षण सार्वजनिक गर्नुभएको हो । आर्थिक सर्वेक्षणमा आर्थिक वर्ष २०७९÷८० मा नेपालको आर्थिक वृद्धिदर कम हुने अनुमान गरिएको उल्लेख छ । आर्थिक वर्ष २०७९–८० मा नेपालको आर्थिक वृद्धि आधारभूत मूल्यमा २ दशमलब १६ प्रतिशत हुने सरकारको अनुमान छ । ऊर्जा उत्पादनमा वृद्धि भएको कारण विद्युत्, ग्यास, वाष्प र वातानुकुलित क्षेत्रको उत्पादन भने १९ दशमलब ० प्रतिशतले विस्तार हुने अनुमान पनि सरकारको छ ।
गत आर्थिक वर्षमा नेपालको आर्थिक वृद्धि आधारभूत मूल्यमा ५ दशमलब २६ प्रतिशत रहेको थियो । यस्तै चालु आर्थिक वर्षमा कृषि क्षेत्रको वृद्धिदर बढ्ने अनुमान गरिएको छ । यस अवधिमा कृषिको २ दशमलब ७३ प्रतिशत र गैरकृषि क्षेत्रको वृद्धिदर १ दशमलब ९२ प्रतिशत रहने अनुमान छ । गत आर्थिक वर्षमा यस्तो वृद्धिदर क्रमशः २ दशमलब २४ प्रतिशत र ६ दशमलब ५६ प्रतिशत रहेको थियो । विगतका वर्षदेखि नै कुल गार्हस्थ्य उत्पादनमा कृषि क्षेत्रको योगदान क्रमशः घट्दै र सेवा क्षेत्रको योगदान बढ्दै गएको पनि सरकारको भनाइ छ । उद्योग क्षेत्रको योगदान भने करिब स्थिर रहेको छ ।
