भक्तपुरमा ७५.७५ प्रतिशत मतदान, आज राती देखि नै मतगणनाको तयारी
भक्तपुर, बैशाख ३० गते
१लाख ८९ हजार ५ सय ८४ मतदाता रहेको भक्तपुर जिल्लामा १ लाख ४३ हजार ६ सय २३ जनाले मतदान गरेको जिल्ला निर्वाचन कार्यालय भक्तपुरले जनाएको छ । यसरी मतदान गर्नेहरुमा ७० हजार ८ सय ४० पुरुष र ७२ हजार ७ सय ८१ महिला मतदाता रहेका हुन । भक्तपुर जिल्लाका ४ वटा स्थानीय तहहरुका ७७ मतदान स्थलका २१९ मतदान केन्द्रबाट शुक्रबार भएको मतदान ७५.७५ प्रतिशत रहेको जिल्ला निर्वाचन कार्यालयले जनाएको छ ।
१६ वटा मतदान स्थलका ६२ वटा मतदान केन्द्रबाट भक्तपुर नगरपालिकामा भएको मतदानमा ४३ हजार ३७४ मत खसेको थियो जुन ७६ प्रतिशत रहेको छ । सो नगरपालिकामा ५७ हजार २७० मतदाता रहेका थिए । यसै बीच चाँगुनारायण नगरपालिकाका४३ हजार १०५ मतदाताहरु मध्ये ३३ हजार ३८८ जना अर्थात ७७ प्रतिशतले मतदान गरेका थिए । सो नगरपालिकामा २१ मतदान स्थलका ५३ मतदान केन्द्रहरु थिए । मध्यपुर थिमी नगरपालिकामा ३१ हजार ४१०ले मतदान गर्दा मतदान गर्नेको प्रतिशत ७५ रहेको छ । त्यहा कुल मतदाता४१ हजार ८३९ जना थियो भने सूर्यविनायक नगरपालिकामा ४७ हजार ३६५ मतदाताहरु मध्ये ३५ हजार ५५१ जनाले मतदान गर्दा मतदान गर्नेको प्रतिशत ७५ नै थियो ।
मतदान पस्चात सम्वन्धित नगरपालिकाको निर्वाचन कार्यालयमा मत पेटिका जम्मा गरिसकेको छ भने आज रातिदेखि नै मतगणना गर्ने तयारी भइरहेको छ ।
