बेखाल स्वास्थ्य केन्द्रमा पाठेघरको मुखको क्यान्सर स्क्रिनिङ तथा स्तन परीक्षण शिविर
भक्तपुर, मंसिर १३ ।
भक्तपुर नगरपालिका–१० नं. वडा कार्यालयको आयोजनामा शनिबार बेखाल स्वास्थ्य केन्द्रमा पाठेघरको मुखको क्यान्सर स्क्रिनिङ तथा स्तन परीक्षण शिविर सम्पन्न भएको छ ।
महिलामाझ क्यान्सरसम्बन्धी जोखिम, प्रारम्भिक पहिचान र समयमा उपचारको महत्वबारे जनचेतना फैलाउने उद्देश्यले आयोजना गरिएको शिविरलाई स्थानीयवासीको उल्लेख्य सहभागिता प्राप्त भएको वडा कार्यालयले जनाएको छ ।
कार्यक्रममा प्रमुख अतिथि तथा नभक्तपुर नगरपालिकाका उप–प्रमुख रजनी जोशीले नगरपालिकाले घोषणापत्रमा उल्लेखित स्वास्थ्यसम्बन्धी कार्यक्रमहरूलाई द्रुतगतिमा अघि बढाइरहेको बताइन्। उनले भक्तपुर आज शैक्षिक गन्तव्यस्थलका रूपमा पुनःस्थापित हुँदै गएको उल्लेख गर्दै, ख्वप अस्पतालमा घुँडाको प्रत्यारोपण सफल रूपमा सम्पन्न भइसकेको समेत जानकारी दिइन्।
उप–प्रमुख जोशीले भन्नुभयो— क्यान्सरका बिरामीहरू देशभर बढ्दै गइरहेका छन् र भक्तपुर नगरपालिकाले कडा रोग लागेकालाई १५ हजार रुपैयाँको आर्थिक सहयोग दिदै आइरहेको छ। समयमै परीक्षण र औषधोपचार नगरे क्यान्सर जटिल बन्ने भएकाले सबै महिलालाई नियमित रुपमा स्वास्थ्य परीक्षण गर्न आवश्यक छ ।
यससँगै उनले चीनको स्वशासित साननान क्षेत्रबाट भक्तपुर नगरपालिकालाई ल्याप्रोस्कोपी मेसिन हस्तान्तरण गरिसकेको जानकारी दिनुभयो। नगरपालिकाले आगामी मंसिर १७ गते विश्व अपांगता दिवस र मंसिर २० गते योमरी उत्सव प्रतियोगिता आयोजना गर्न लागेको समेत उहाँले जानकारी दिनुभयो ।
प्रमुख अतिथि जोशीले बढ्दो लैङ्गिक हिंसा नियन्त्रणका लागि वडा–वडामा जनचेतना कार्यक्रम सञ्चालन गरिने पनि बताउनुभयो ।
कार्यक्रमका सभापति तथा भक्तपुर नगरपाकिा १० नं वडा अध्यक्ष लक्ष्मीप्रसाद ह्यौँमिखाले जनस्वास्थ्यलाई प्राथमिकता दिएर यस्तो स्वास्थ्य शिविर सञ्चालन गरिएको बताए। उनले रोग नियन्त्रणका अभियानलाई सबै वडामा विस्तार गर्दै जाने उल्लेख गर्दै, ख्वप अस्पतालसँग सहकार्यमा बेखाल स्वास्थ्य केन्द्रलाई बिहानैदेखि नियमित सेवा सञ्चालन गर्ने तयारी भइरहेको जानकारी दिए। साथै, पुस महिनादेखि हाडजोर्नी शिविर समेत सञ्चालन हुने जानकारी दिनुभयो ।
कार्यक्रममा ख्वप अस्पतालका नर्स अधिकृत रचना सुवालले हरेक ३ देखि ५ वर्षमा पाठेघरको मुखको क्यान्सर स्क्रिनिङ गर्न अनिवार्य रहेको बताउँदै, ख्क्ष्ब् परीक्षणमार्फत प्रारम्भिक अवस्थामा नै क्यान्सरको जोखिम पत्ता लगाउन सकिने जानकारी दिइन्।
कार्यक्रममा वडा सदस्य जितेन्द्र मुनकर्मी र कृष्ण नारायण दुमरुले पनि बोल्नुभएको थियो ।
ख्वप अस्पतालको प्राविधिक सहयोगमा सम्पन्न भएको शिविरमा ९७ जनाले स्वास्थ्य परिक्षण गरिएको वडा निरिक्षक रामकृष्ण प्रजापतिले जानकारी दिएको छ ।
