सिद्धिस्मृति अस्पतालको नयाँ भवनबाट सेवा सुरु
भक्तपुर, बैशाख १५ गते
सिद्धिस्मृति प्रतिष्ठानद्वारा सञ्चालित सिद्धि स्मृति महिला तथा बाल अस्पताल भेलुखेलले हालै निर्माण सम्पन्न गरेको नयाँ भवनबाट सेवा सुरु गरेको छ । महिला तथा बाल रोग सम्बन्धि ओपिडि सेवालाई आज आयोजित एक समारोह बीच नेपाल इनहिल्प बेइलग्रिज इभि जर्मनीका पूर्व अध्यक्ष मिस्टर मिची र मिसेस् मिचाइल रेबेलेले संयुक्तरुपमा आज सेवा शुभारम्भ गरेका हुन ।
स्व.सिद्धिसुन्दर धौभडेलको ३६ औं जन्मदिवसको अवसरमा सो सेवा प्रारम्भ गरेको प्रतिष्ठानका अध्यक्ष स्यामसुन्दर धौभडेलले जनाएको छ । अध्यक्ष धौभडेलका अनुसार अस्पतालको नयाँ भवन निर्माण र सेवा विस्तारकालागि नेपाल इनहिल्प बेइलग्रिज इभि जर्मनीले महत्वपूर्ण सहयोग गरेको थियो । गत चैत्र १ गते उद्घाटन भएको सो भवनबाट औपचारिक रुपमा ओपिडि सेवा आजबाट प्रारम्भ गरेका हुन । सेवा सुरु भएको अवसरमा उपचारमा आएको बालबालिकाहरुलाई उपहार प्रदान गरिएको थियो ।
