आजै उठायो, आजै ढाल्यो ।
भक्तपुर, बैशाख १ गते
भक्तपुरको ऐतिहासिक विस्का जात्रा अन्तर्गत महत्वपूर्ण पर्वको रुपमा रहेको योसी द्यः(लिंगों ) थानेगु व क्वथेगु (उठाउने र ढाल्ने) जात्रा यस वर्ष एकै दिन सम्पन्न गरेको छ । हरेक वर्षको अन्तिम दिन योसिं द्यः उठाउने परम्परा रहे अनुसार चैत्र ३१ गते योसिं द्यः (लिंगो) उठाउने भरपूर प्रयास भएको थियो । रातभरको प्रयास पनि विफल भएपछि आज विहान देखिको प्रयास स्वरुप दिउँसो १ बजेर २१ मिनेटको समयमा लिंगो उठाउन सफलता पाएको थियो । जात्रालुसँगै सेना, प्रहरी र विभिन्न टिम क्लवका स्वयवसेवहरुको सक्रियतामा यस वर्ष ढिला भएपनि लिंगो ढाल्ने दिन नै लिंगो उठाएका हुन । हसे हाईसेको ताल मिल्ने बितिक्कै जुक जुक योसिं द्यः (लिंगो) उठेर आउँदाको माहोल र रौनक बेजोडको हुन्थ्यो । यस्तो कयौं रौनकहरु पार गर्दै अन्तत नयाँ वर्षको पहिलो दिन दिउँसो मात्रै यस वर्ष लिगो उठाउन सफलता मिलेको थियो ।
लिंगो उठाएपछिको खुसियाली, नाँगचान पश्चात आज साँझ विधिवूर्वक लिंगो ढालिएको छ । नयाँ वर्षको पहिलो दिन साँझ योसिं द्यः (लिंगो)लाई न्हलं ब्वाक (निदाउन दिएर) परम्परा अनुसार ढालेको हो । लिंगो ढालेसँगै विस्का जात्राको एक महत्वपूर्ण जात्रा सम्पन्न भएको छ । सोही अवसरमा भैलखः (भैरवनाथ) र नकिंजू खचाः (भद्रकालीको रथ) योसिंखेलबाट तानेर खलामा जुडाउने परम्परा छ । सोही परम्परा पनि आज लिंगो ढाल्ने कार्य सम्पन्न भएसँगै पूरा गरेको छ । मुख्य जात्रासम्पन्न भएसँगै चैत्र २ गते देखि स्थानीय जात्राहरु धुमधामले मनाउने परम्परा रहि आएको छ ।
