एक महिनामा आगलागीमा परेर १२ जनाको मृत्यु ।।
एक महिनामा आगलागीमा परेर १२ जनाको मृत्यु भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरण्काअनुसार गत एक महिनामा आगलागीका ३७० वटा घटना भएका छन् । जसमा परेर ६७ जना घाईते भएका छन् । आगलागीका घटनाका कारण ४२ वटा भौतिक संरचना नष्ठ भएका छन् भने एक अर्व ४३ करोडको आर्थिक क्षति समेत भएको छ । २७८ वटा गाईबस्तु मरेका छन् । चिसो मौसममा आगो ताप्दा ध्यान नदिनु र विधुत सट् भएर हुने आगलागिको सङ्ख्या उच्च रहेको प्राधिकरणले जनाएको छ । आगो निभाउन सक्ने अवस्थाको भए निभाउने नभए १०१ नम्बरमा फोन गरेर दमकल बोलाउन सकिने अग्नि नियन्त्रक राजकुमार ठकुरीले बताउनुभयो । शहरी क्षेत्रमा चिसो मौसममा नुहाउन प्रयोग गरिने ग्यास हिटर तथा गिजरको प्रयोगमा सावधानी नअपनाउदा वर्षेनी मृत्यु हुने मानिसको सङ्ख्या बढ्दै गएको भन्दै यस्ता उपकरणको प्रयोग गर्दा ध्यान दिन डाक्टरले सुझाव दिएका छन् । कन्सल्टेन्ट फिजिसियन डा. रोशनकुमार झाले सीआइएन मार्फत सकेसम्म ग्यास गिजरको प्रयोग कम गर्न अनुरोध गर्नुभयो । जोडो मौसममा नुहाउन बाथरुमभित्र मात्रै होइन, कोठा तताउन बालिएको हिटरको कारणले पनि निसास्सिएर मृत्यु हुने गरेको छ । यसको जोखिम कम गर्न अक्सिजन राम्ररी पास हुनसक्ने भेन्टिलेसनको व्यवस्था गर्नुपर्ने विज्ञहरुको सुझाव छ ।
