पानीमा डुबेर चित्तपोलमा एक बच्चाको निधन, थप अनुसन्धान जारी
भक्तपुर, श्रावण २२ गते
प्लाष्टिकको बाल्टिनमा डुबेर चित्तपोलमा एक बच्चाको मृत्यु भएको छ । हिजो साँझा २० लिटरको प्लास्टिकको बाल्टिनमा डुबेर अशक्त भएका बालिकाको उपचारकोक्रममा मृत्यु भएको महानगरीय प्रहरी परिसर भक्तपुरले जनाएको छ । सिन्धुपाल्चोक बाह्रविसे घर भई हाल चित्तपोल भक्तपुर बस्दै आएका गिता बस्नेतकी ११ महिनाकी छोरी नेलिस्ता बस्नेतको खेल्नेक्रममा अचानक पानी भएको २० लिटर प्लास्टिकको बाल्टिनमा डुबेर अशक्त भएकी थिइन । अशक्त बालिकालाई ख्वप अस्पताल च्याम्हासिंहमा ल्याई उपचार गर्नेक्रममा हिजो साँझ १८ः४०मा निधन भएको प्रहरीले जनाएको छ । लाश पोष्टमार्टमको लागि काठमाण्डौ मेडिक कलेज दुवाकोट भक्तपुर लगिएको प्रहरीले जनाएको छ । महानगरीय प्रहरी परिसर भक्तपुरका सूचना अधिकारी राजन कार्कीका अनुसार सो घटनाको सम्बन्धमा थप अनुसन्धान कार्य भइरहेको छ ।
