अपांगता भएकाहरुकाका लागि भक्तपुरमा नमूना मतदान कार्यक्रम आयोजना
भक्तपुर, बैशाख २२ गते
सुरेशप्रसाद सायंजू । रेडियोजनसञ्चार
आसन्न निर्वाचनलाई लक्षित गरी भक्तपुरमा मतदाता शिक्षा र नमूना मतदान सम्बन्धि अभिमुखिकरण कार्यक्रम आयोजना गरेको छ । भक्तपुर जिल्लामा रहेका अपांगता भएका व्यक्तिहरुलाई सहजरुपमा मतदान प्रकृयामा सहभागि राउन सो अभिमुखिकरण गरेको आयोजक समिति अपांग महिला महासंघ नेपालले जनाएको छ । सो अवसरमा सहभागि अपांगता भएका मतदाताहरुले आफूहरुको मतदान गर्ने अधिकारलाई सुरक्षित गर्न अपांग मैत्री मतादान केन्द्र, मतदानको गोप्यता हुने गरी मतदान सहयोगि हुनुपर्नेमा जोड दिएका छन् । आफ्नै परिवारको सदस्यको सहयोगमा मात्र मतदान गर्नुपर्ने दृष्टिविहिनहरुको समस्यालाई यस वर्षको निर्वाचनले सम्बोधन गरी जो सुकै सहयोगी मार्फत मतदान गराउने प्रकृया मिलाउनुपर्नेमा जोड दिएका छन् । यूएनडिपी नेपालको सहकार्यमा आयोजित सो अवसरमा नमूना मतदान कार्यक्रम पनि आयोजना गरेको थियो । सो मतदान कार्यक्रमले आसन्न निर्वाचनमा ढुक्क भएर मतदान गर्न सकिने भएको सहभागिहरुले जनाएको छ।
