पानी पर्न बन्द भएपछि कोशी नदीमा पानीको बहाव घट्दै ।
अविरल वर्षाका कारण सप्तकोसी नदीमा पानीको बहाव उच्च भएपछि ३५ वटा ढोकाहरू खोलिएका छन् । पहाडी क्षेत्रका साथै तराईमा पनि अत्यधिक वर्षा भइरहेकाले कोसीमा पानीको बहाव उच्च भएको हो । आज दिउँसो गरिएको मापनअनुसार कोसी नदीमा करिब २ लाख ४० हजार क्युसेक पानीको बहाव रहेको सप्तरीका प्रमुख जिल्ला अधिकारी जनार्दन गौतमले सीआईएनलाई जानकारी दिनुभयो । उहाँका अनुसार पानीलाई निकास दिन ब्यारेजका ५६ मध्ये ३५ वटा ढोका खोलिएका छन् । आज बिहानदेखि पानी नपरेका कारण नदीमा पानीको बहाव विस्तारै घट्दै गएको पनि गौतमले बताउनुभयो । पानीको बहाव उच्च भएर जोखिम बढेपछि बिहान सतर्कतासूचक रातो बत्ती बालिएको थियो । नदीमा पानीको सतह बिहान २ लाख ७० हजार क्युसेक मापन गरिएको थियो । नदीको तटीय क्षेत्र र आसपासका बासिन्दालाई सतर्क रहन भनिएको छ ।
