जापानले नेपाललाई कोभ्याक्स कार्यक्रम मार्फत १६ लाख डोज कोरोना खोप दिने ।
जापानले नेपाललाई कोभ्याक्स कार्यक्रम मार्फत करिब १६ लाख डोज कोरोना खोप दिने भएको छ । काठमाडांै स्थित जापानी राजदूतावासले प्रेस विज्ञप्ति जारी गर्दै नेपाललाई १६ लाख डोज खोप प्राप्त हुने बताएको छ । यसअघि जापानका विदेश मन्त्री तोसिमित्सु मोटेगीले नेपाल लगायत एसियाली मुलुकहरुलाई १ करोड १० लाख डोज कोरोना खोप अनुदानमा दिने घोषणा गर्नुभएको थियो । सोही खोपमध्येको १६ लाख डोज खोप नेपालले पाउन लागेको हो । जापानले नेपाललाई एस्ट्राजेनेका र अक्सफोर्ड युनिभर्सिटीले विकास गरेको खोप दिन लागेको हो । यो खोप कोभिशिल्ड खोपको पहिलो डोज लगाएका ज्येष्ठ नागरिकले पनि लगाउन मिल्छ । जापानी दूतावासले उक्त खोप नेपालले जुलाईको मध्यदेखि एक महिनाभित्र बीचमा प्राप्त गर्ने विज्ञप्ति मार्फत जनाएको छ ।
