सडक दुर्घटनामा पैदलयात्रीको मृत्यु परार चालक पक्राउ!
भक्तपुर
सडक दुर्घटनामा एक पैदलयात्रीको मृत्यु भएको छ भने दुर्घटना पश्चात फरार रहेका चालकलाई प्रहरीले नियन्त्रणमा लिएको छ । हिजो दिउँसो १२ः१५ बजेको समयमा भएको सडक दुर्घटनामा घाइते पैदलयात्री बिमला प्रधानाङ्गको उपचारकोक्रममा मृत्यु भएको महानगरीय प्रहरी परिसर भक्तपुरले जनाएको छ । ठक्करबाट गम्भिर घाइते भएका प्रधानाङ्गको मध्यपुर अस्पतालमा उपचारको क्रममा निधन भएको प्रहरीले जनाएको छ ।
घटना विवरण अनुसार सूर्यविनायक नगरपालिका वडा नं. ५ स्थित कटुञ्जेचोक स्थित सूर्यविनायकबाट सल्लाघारी तर्फ जाँदै गरेको बागमती प्र. ०२(०२१ प्र. ८१२७ नम्बरको पल्सर मोटरसाइकलले पैदलयात्री भक्तपुर जिल्ला भक्तपुर नगरपालिका वडा नं. ६ भोलाछे घर भई हाल भक्तपुर कटुञ्जे बस्ने बर्ष ६९ की बिमला प्रधानाङ्गलाई ठक्कर दिदा गम्भिर घाईते भएकी थिइन । दुर्घटना पश्चात उपचारमा रहेकी प्रधानाङ्गको आज मृत्यु भएको महानगरीय प्रहरी परिसर भक्तपुरका सूचना अधिकारी ढुण्डीराज नेउपानेले आज एक विज्ञप्ति जारी गर्दै सो कुरा जानकारी दिएका हुन ।
घटना पश्चात फरार रहेका २६ वर्षका सवारी चालक दिपक मानन्घरलाई भने प्रहरीले मोटर साइकल सहित नियन्त्रण लिएको छ । चालक मानन्घर रामेछाप सुनापाती गाँउपालिका वडा नं. ५ घर भई हाल भक्तपुर जिल्ला चाँगुनारायण नगरपालिका वडा न. १ दुवाकोट बस्दै आएका थिए । प्रहरी वृत्त जगातीले मानन्घरलाई नियन्त्रणमा राखि थप अनुसन्धान गरी रहेको सूचना अधिकारी नेउपानेले जनाएको छ ।
