चाँगुनारायणका उपप्रमुख बुढाथोकीले सुविधाको गाडी अस्पताललाई दिए
जेठ २७
भक्तपुर । चाँगुनारायण नगरपालिकाका उपप्रमुख रमेश बुढाथोकीले आफुले पाउने सेवा सुविधा समाजको हितकोलागि प्रयोग गर्ने हुनुभएको छ ।
बुढाथोकीले आफ्नो पूर्वघोषणा अनुसार आफुले नगरपालिकाबाट पाउने सुविधको बा २ झ १६२३ नं. सुविधाको गाडी चाँगुनारायण नगर अस्पताललाई हस्तान्तरण गर्नुभएको हो । निर्वाचित हुनु अघि नगरपालिकाबाट आउने सेवा सुविधा लगायत तलब भत्ता नलिने घोषणा गर्नुभएका बुढाथोकिले नगरबाट सुविधाका रुपमा पाउने गाडी नगर अस्पतालमा प्रदान गर्नुभएको हो ।
उपप्रमुखले शुक्रबार एक कार्यक्रम बिच उक्त गाडी चाँगुनारायण अस्पतालका प्रमुख लोकेन्द्र पौडेललाई हस्तान्तरण गर्नुभएको हो । उक्त गाडी नगर क्षेत्रभित्र रहेका जेष्ठ नागरिक, शारीरिक अशक्त, दिर्घरोगी, बिरामीहरूको सेवामा उपयोग गरिने अस्पतालले जानकारी दिएको छ ।
सो गाडीले घरदैलोमै गई बिरामीलाई चिकित्सकिय सेवा प्रदान गर्ने उद्देश्यले अस्पताललाई हस्तान्तरण गरिएको हो, उपप्रमुख बुढाथोकीले भन्नुभयो ।
उहाँले पाउने तलब भत्ता पनि छुट्टै कोष खडा गरि नगर क्षेत्रका गरिव जेहेन्दार विद्यार्थीको पठनपाठन, एकल महिला, अपाङ्ग अशक्त ब्यक्तिहरुको वृद्धि विकासको क्षेत्रमा खर्च गरिने जानकारी दिनुभएको छ ।
