भक्तपुर, जेष्ठ १४ गते
काठमाण्डौ उपत्यकामा पछिल्लो पटक कोरना भाइरसका संक्रमित देखिन थालेपछि रक्त सञ्चार केन्द्र भक्तपुरमा रगतको अभाव हुन थालेको छ । अहिले स्टकमा रहेको रगतले माग पूर्ति गरीरहे पनि नियमित रक्तदानका कार्यक्रमहरु हुन नसक्दा भने रगतको अभाव हुने संकेत देखिएको छ । रगत लिन आउनेहरुबाटै ताजा रगत र पिआरपी रगत जोह गर्दै आएको उल्लेख गर्दै कोरना भाइरसको संक्रमण बढेसँगै रगतको अभाव हुन थालेको रक्तसञ्चार केन्द्र भक्तपुरले जनाएको छ । भक्तपुरको रक्त सञ्चार सेवा केन्द्रले काठमाण्डौ उपत्यका र आसपासका क्षेत्रमा समेत रगत आपूर्ति व्यवस्थापन गर्दै आएको भक्तपुर रक्तसञ्चारमा रगत अभाव हुन थालेपछि उपचारमा रहेका विरामीहरुलाई रगतको जोह गर्न असहज हुने देखिएको छ ।
लक डाउन सुरु भएपछि रगतको अभाव होला भने लागेको थियो, त्यसो भएन, पर्याप्त रगत संकलन भयो । लक डाउनमै संकलन भएका रगत अहिले बितरण भइरहेको छ । तर काठमाण्डौमा कोरना भाइरसको संक्रमण देखिन थालेछि भने ब्लड डोनर्स एसोशियनले समेत सार्वजनिक रुपमा रक्तदानका कार्यक्रमहरु गर्न छोडेको छ । त्यसपछि रगतको अभाव हुन थालेको ब्लड बैंक भक्तपुरका प्रमुख उक्तम कुस्माले जनाएको छ । ब्लड डोनर्स एशोसियशनले टोल टोलमा रक्तदान अभियान, एक परिवार एक जनाको रक्तदान अभियान सञ्चालन गर्दा दैनिक दुई चार ठाउँमा रक्तदानका कार्यक्रमहरु आयोजना हुँदै आएको थियो अहिले त्यो पनि सून्य छ उहाँले बताउनु भयो । स्तकमा रहेको २६ सय यूनिटले अहिले माग पूर्ति गरिरहेको, त्यो पनि ५।६ सय मात्रै बाँकी हुँदा अर्को हप्तालाई समस्या हुने देखिएको उहाँले बताउनु भयो । रगतबाट आडिटि परिक्षण गरी कोरना संक्रमण भए नभएको हेर्ने प्रविधिको प्रयोगसँगै रगतले कोरना सर्छ की सर्दैन ? भन्ने समुदायमा केही जिज्ञासा र भ्रम पनि सृजना भएकाले पनि कोरना संक्रमण बढेपछि रक्तदानका कार्यक्रमहरु प्रभावकारी हुन नसकेको उहाँले बताए ।
यो विषम परिवेशमा भक्तपुर रेडक्रसका उपशाखाहरुलाई रक्तदानका कार्यक्रमहरु आयोजना गर्न आह्वान गर्न थालेको भन्दै रेडक्रस भक्तपुरका जिल्ला सभापति मनोजकुमार थापाले विपद्मा पनि रक्तसञ्चार सेवालाई प्रभावकारी बनाउन लागि रहेको बताउनु भयो । सुडाल, झौखेलका रेडक्रस उपशाखाहरुले कोरना संक्रमणको बीचमा पनि रक्तदान कार्यक्रम आयोजना गरिसकेको उल्लेख गर्दै अरु उपशाखाहरुले पनि रक्तदान कार्यक्रमहरु राख्ने तयारी गरि रहेकाले रगतको अभाव हुन नदिने सभापति थापाले बताउनु भयो ।
दैनिक १ सय ७५ यूनिट देखि २ सय यूनिटसम्म रगतको माग भइरहँदा कोरनाका कारण रक्तदानका कार्यक्रमहरु आयोजना हुन नसक्दा रगत अभाव हुनु स्वाभाविक भए पनि सुरक्षित तवरले रक्तदानका कार्यक्रमहरु आयोजना गर्ने तयारी भइरहेको सक्तसञ्चार सेवा केन्द्र भक्तपुरले जनाएको छ ।
